இலங்கைத் தமிழ் மக்களின் நலம் காக்கவே ஐக்கிய நாடுகள் மனித உரிமைப் பேரவையில் இலங்கைக்கு எதிராக முன்வைக்கப்பட்ட தீர்மானத்தின் மீதான வாக்கெடுப்பில் கலந்து கொள்ளவில்லை என்று இந்திய வெளியுறவுத்துறை அமைச்சு அறிவித்துள்ளது.

இந்திய வெளியுறவுத்துறை அமைச்சகத்தின் செயலாளர் சுஜாதா சிங்கினை மேற்கொள் காட்டி ‘தி ஹிந்து’ பத்திரிகை வெளியிட்டுள்ள செய்தியிலேயே மேற்கண்டவாறு தெரிவிக்கப்பட்டுள்ளது.

சுஜாதா சிங் மேலும் தெரிவித்துள்ளதாவது, “இலங்கைத் தமிழர் நலன் மற்றும் முன்னேற்றம் காப்பதில் இந்திய அரசு எப்போதும் அதிக அக்கறையுடன் செயல்பட்டு வருகிறது. தமிழீழ விடுதலைப் புலிகளுக்கு எதிரான போர் 2009இல் முடிவுக்கு வந்தது, ஒருங்கிணைந்த இலங்கையில் அனைவரின் அரசியல் உரிமைகளை பாதுகாக்கும் வாய்ப்பினை அளித்துள்ளது.

இலங்கைத் தமிழர் உட்பட அனைத்து சமூகத்தவர்களின் நலம் மற்றும் உரிமைகளை காப்பதே, இந்திய அரசின் நோக்கமாகும். இதுவரை இலங்கை தொடர்பாக இந்தியா எடுத்த நிலைப்பாடுகள் அனைத்தும், இதன் அடிப்படையில் ஆனதே.

ஜெனீவாவில் வியாழக்கிழமை இலங்கைக்கு எதிராக அமெரிக்கா கொண்டுவந்த தீர்மானம் மீதான வாக்கெடுப்பில் கலந்துகொள்ளாததும், இந்த நோக்கத்தை வலுப்படுத்துவதாக அமையும் என்று நம்புகிறோம்.

இலங்கையில் உள்ள தமிழர்கள் நியாயம் பெறவும் முன்னேற்றம் காணவும் பன்னாட்டு சமூகம், இலங்கை அரசுடன் இணைந்து செயல்பட வேண்டும். ஜெனீவாவில் இந்திய அரசு எடுத்த நிலைப்பாடு என்பது இதற்கான சுயவிளக்கமாக அமைகிறது. இலங்கையில் இதுவரை நடந்துள்ள முன்னேற்றப் பணிகளை நாம் அங்கீகரிக்கிறோம்.

இத்துடன், அதிதீவிர பாதுகாப்புக்கு உட்படுத்தப்பட்டுள்ள பகுதிகளை குறைப்பது, காணாமல் போனவர்கள் விவகாரம், இராணுவம் கையகப்படுத்திய நிலங்களை படிப்படியாக உரிமையாளர்களிடம் திருப்பி அளிப்பது, குடியிருப்புப் பகுதிகளில் நிறுத்தப்பட்டுள்ள இராணுவத்தை குறைப்பது உட்பட தமிழர்களின் பல்வகை நலன்களில் இந்தியா மிகுந்த கவனம் கொண்டுள்ளது.

இதைச் செயல்படுத்த, ஐ.நா.வாக்கெடுப்பில் கலந்துகொள்ளாதது உதவியாக இருக்கும் என எண்ணுகிறோம். இது இலங்கைத் தமிழர்களின் முன்னேற்றத்திற்கும், இந்திய அரசின் செயல்பாடுகளுக்கும் உதவியாக இருக்கும். இதனுடன், தமிழ்நாடு, புதுச்சேரி மீனவர்களுக்கும் பயன் தருவதாகவும் இருக்கும்” என்றுள்ளார்.