தமது கட்சித் தொண்டர்களுக்கு அதிமுக தலைமை அமைதி காக்க அறிவுரை வழங்க வேண்டும் என்று மதிமுக பொது செயலாளர் வைகோ அறிவுறித்தி உள்ளார்.

அதிமுக பொது செயலாளர் கைது செய்யப்பட்டு சிறையில் உள்ள இந்த நேரத்தில் அதிமுக தலைமை தமது தொண்டர்களுக்கு நாவடக்கம் காக்க வேண்டியும், அமைதிக் காக்க வேண்டியும் அறிவுரை வழங்க வேண்டும் என்று வைகோ கூறியுள்ளார். மதுரையில் அவர் நிகழ்ச்சி ஒன்றில் கலந்துக்கொண்டு பேசுகையில், அதிமுக தொண்டர்கள் வரம்பு மீறிப் பேசுவதாகவும், வரம்பு மீறிய செயல்களில் ஈடுபடுவதாகவும் குற்றம் சாட்டியுள்ளார்.

மேலும், மதுரை கலிங்கப்பட்டியில் உள்ள தமது இல்லத்தின் முன்னர் அதிமுகவினர் கூடாரம் போட்டு, தம்மை வசை பாடிப் பேசியுள்ளதை சுட்டிக்காட்டியுள்ள வைகோ, தாம் அதிமுக அரசின்போது கைது செய்யப்பட்டு சிறையில் இருந்தபோது, தமது தொண்டர்கள் ஒருபோதும் அதிமுகவையோ, ஜெயலலிதாவையோ வசைப்பாடிப் பேசியதில்லை என்று கூறியுள்ளார். தற்போது தமிழகத்தில் நிலவும் வன்முறைகள் அச்சமூட்டுபவையாக இருப்பதால், அதிமுக தொண்டர்களை அதிமுக தலைமை அமைதிக்காக்கவும், வன்முறையில் ஈடுபடாமல் இருக்கவும், அடுத்தவர்களை வசை பாடாமல் இருக்கவும் அறிவுரை வழங்க வேண்டும் என்றும் வைகோ கோரிக்கை வைத்துள்ளார்.