தமிழீழ விடுதலைப் புலிகள் அமைப்பின் சாள்ஸ் அன்ரனி படைப் பிரிவின் முன்னாள் சிறப்புத் தளபதி நகுலன் என்கிற கணபதிப்பிள்ளை சிவமூர்த்தி யாழ்ப்பாணத்தில் வைத்து நேற்று செவ்வாய்க்கிழமை பயங்கரவாதக் குற்றத்தடுப்புப் பொலிஸாரினால் கைது செய்யப்பட்டுள்ளார்.

2009ஆம் ஆண்டு போர் நிறைவடைந்த பின்னர் காணாமற்போயிருந்த சில தளபதிகளில் இவரும் ஒருவர் என கூறப்பட்டிருந்த நிலையில், நீர்வேலி பகுதியில் கடந்த சில வருடங்களுக்கு முன் இவர் திருமணம் முடித்திருந்தார்.

இந்த நிலையில், நேற்று காலை 10.00 மணிக்கு சிவில் உடையில் நீர்வேலி கந்தசாமி கோவிலடி நீர்வேலி தெற்கு என்னும் முகவரியில் அமைந்துள்ள இவரது வீட்டுக்குச் சென்ற பயங்கரவாதக் குற்றத்தடுப்பு பொலிஸார் நகுலன் என்ற முன்னாள் விடுதலைப் புலிகளின் தளபதியை கைது செய்துள்ளனர். இவர் ஒரு பிள்ளையின் தந்தை என்பது குறிப்பிடத்தக்கது.

தமிழீழ விடுதலைப் புலிகள் அமைப்பில் தளபதியாக இருந்து அரச படைகளிடம் சரணடைந்து புனர்வாழ்வு பெற்ற ராம் என்பவரையும் சில தினங்களுக்கு முன்னர் அம்பாறையில் வைத்து பயங்கரவாதக் குற்றத்தடுப்புப் பொலிஸார் கைது செய்திருந்தமை சுட்டிக்காட்டத்தக்கது.