இந்தியாவிலேயே தில்லான மனிதர் தேமுதிக தலைவர் விஜயகாந்த் தான் என்று நடிகர் விஜய டி.ராஜேந்தர் கூறியுள்ளார்.

நடிகர் டி ராஜேந்தர் இன்று காலை சென்னை பொலிஸ் கமிஷனர் அலுவலகத்திற்கு ஏதோ ஒரு புகார் கொடுப்பதற்காக வந்துள்ளார். ஆனால் அவர் வந்த நேரத்தில் கமிஷனர் அங்கு இல்லை.

இதையடுத்து மனு கொடுக்காமலேயே திரும்பிய அவர் செய்தியாளர்களிடம் பேசுகையில், நாடாளுமன்ற தேர்தலில் பெரிய கட்சிகளே இன்னும் தெளிவான முடிவு எடுக்காமல் உள்ளன. இந்த தேர்தலில் காங்கிரசுக்கு எதிரான ஓட்டுக்களை லட்சிய திமுக ஒருங்கிணைக்கும். ஈழப்பிரச்சனைக்காக எனது சிறு சேமிப்புத்துறை பதவியை துறந்தவன் நான்.

இந்த தேர்தலில் என்னை பிரசாரத்துக்கு அழைக்கும் கட்சிகளுடன் இணைந்து தேர்தலை சந்திப்பேன். தேர்தலில் சீட்டு வாங்காமல் ஓட்டு கேட்கும் நிலையில் லட்சிய திமுக இல்லை.

மேலும் மதுகுடிப்பவர்கள் பற்றி விஜயகாந்த் தெரிவித்த கருத்துக்கு உங்கள் பதில் என்ன என்ற கேள்விக்கு, இது போன்ற துணிச்சலான கருத்து தெரிவிப்பதற்கு இந்தியாவிலேயே விஜயகாந்தை போன்று யாரும் இல்லை. தமிழக மக்கள் அந்த துணிச்சலை அவருக்கு அளித்துள்ளார்கள் என்று தெரிவித்துள்ளார்.

இதனைத் தொடர்ந்து அவரிடம் என்ன புகார் கொடுக்க வந்தீர்கள் என்ற செய்தியாளர்களின் கேள்விக்கு, பொலிஸ் கமிஷனரை சந்தித்து இன்று புகார் மனு கொடுப்பதற்காக வந்தேன். ஆனால் அவரை சந்திக்க முடியவில்லை.

எனவே நாளை வந்து புகார் அளிக்க உள்ளேன் என்றும் அதிகாரிகளிடம் புகார் கொடுத்த பின்னர்தான் அது என்ன புகார் என்பதை தெரிவிப்பேன் எனவும் கூறியுள்ளார்.