தமிழீழ விடுதலைப் புலிகளின் மட்டக்களப்பு மாவட்ட முன்னாள் புலனாய்வுப் பிரிவுப் பொறுப்பாளரான லெப்.கேணல் பிரபா என்று அறியப்பட்ட கிருஷ்ணபிள்ளை கலைநேசன் கைது செய்யப்பட்டுள்ளார்.

இன்று திங்கட்கிழமை காலை 06.30 மணிக்கு மட்டக்களப்பு மஞ்சந்தொடுவாயில் உள்ள அவரின் வீட்டுக்கு சென்ற பொலிஸாரே பிரபாவை கைது செய்துள்ளனர்.

அண்மைய நாட்களாக இனந்தெரியாத நபர்கள் விசாரணைக்கு என அவரின் வீட்டுக்கு சென்றிருந்தனர். எனினும், அவர்கள் தங்கள் அடையாளங்களை உறுதிப்படுத்தவில்லை.

இந்நிலையிலேயே காத்தான்குடிப் பொலிஸாருடன் சென்றவர்கள் பிரபாவை கைது செய்து கொண்டு சென்றனர் என அவரின் மனைவி கயல்விழி ஊடகங்களுக்கு தெரிவித்துள்ளார்.

இறுதி யுத்தத்தில் காணாமல் போயிருந்த பிரபா இராணுவத்தினரால் கைது செய்யப்பட்டிருந்தார். புனர்வாழ்வு அளிக்கப்பட்ட அவர், கடந்த 2013ஆம் ஆண்டு விடுவிக்கப்பட்டிருந்தார் என்பது குறிப்பிடத்தக்கது.