அனுமதி பெறப்படாத குடியிருப்புக்களுக்கு இனிமேல் எந்த விதத்திலும் இடமளிக்கப்படமாட்டாது என்று ஜனாதிபதி மைத்திரிபால சிறிசேன தெரிவித்துள்ளார்.

அவ்வாறே, மேல்மாகாணத்தில் காணிகளை நிரப்புதலையும் முற்றாகத் தடை செய்யுமாறு ஜனாதிபதி பணித்துள்ளார்.

சீரற்ற காலநிலையினால் எதிர்பாராத விதமாக முழு நாடும் எதிர்நோக்கிய அனர்த்த நிலைமைக்கான முக்கிய காரணம் அனுமதி பெறப்படாத குடியிருப்புக்களும் காணிகளை நிரப்புதலுமாகும் என ஏற்புடைய பிரிவுகளினால் சுட்டிக்காட்டப்பட்டுள்ளது.

அதுபற்றி கவனஞ் செலுத்தப்பட்டு ஒட்டுமொத்த நாட்டு மக்களும் மீண்டும் இவ்வாறானதோர் இன்னலை எதிர்கொள்ளாத வகையில் அரசாங்கத்தின் பொறுப்பினை நிறைவேற்றுமுகமாக இந்நடவடிக்கை மேற்கொள்ளப்படுவதாக ஜனாதிபதி மைத்திரிபால சிறிசேன சுட்டிக்காட்டியுள்ளார்.

அவசர அனர்த்த நிலைமையை முகாமை செய்வதற்கான ஜனாதிபதி செயலணியின் கூட்டம் நேற்று திங்கட்கிழமை பிற்பகல் ஜனாதிபதி அலுவலகத்தில் இடம்பெற்ற வேளையிலேயே ஜனாதிபதி மேற்கண்ட விடயங்களைத் தெரிவித்துள்ளார்.

வெள்ளப்பெருக்கினாலும் மண்சரிவினாலும் இடர்களை எதிர்கொண்ட பிரதேசங்களை உயர்பாதுகாப்பு வலயமாக பெயரிடுவதற்கு இதன் போது தீர்மானிக்கப்பட்டதுடன், இப் பிரதேசங்கள் மீண்டும் பாதிப்புக்குட்படுவதற்கான அபாயம் நிலவுவதாலும் இப்பிரதேசங்களின் பாதுகாப்பை உறுதிசெய்வதற்காகவும் இந்நடவடிக்கை மேற்கொள்ளப்படுவதாக தெரிவிக்கப்பட்டது.

அனர்த்த நிலைமையினால் பாதிக்கப்பட்ட பிரதேசங்களில் உள்ள வீடுகளில் மக்கள் மீளக்குடியேறுவதற்கு முன்னர் குறித்த வீடுகளை உரிய தொழிநுட்ப ரீதியான பரிசோதனைக்கு உட்படுத்துமாறு ஜனாதிபதி இதன் போது உத்தியோகத்தர்களுக்கு அறிவிறுத்தல் வழங்கினார்.