இலங்கைக்கான அமெரிக்காவின் உதவிகள் மிகவும் குறைவடைந்திருப்பதாக தெரிவிக்கப்படுகிறது. கடந்த 2012ம் ஆண்டு அமெரிக்கா இலங்கைக்கு 168 மில்லியன் டொலர்களை உதவியாக வழங்கி இருந்தது.

எனினும் இது கடந்த வருடம் 46 மில்லியன்களாக குறைவடைந்திருப்பதாக தெரிவிக்கப்பட்டுள்ளது. இலங்கைக்கு எதிராக சர்வதேச விசாரணைகளை நடத்த வேண்டும் என்று கோரி வருகின்ற நிலையில், இந்த உதவி குறைப்பு இடம்பெற்றுள்ளது. 

அத்துடன் இலங்கையின் அரசியல் சூழ்நிலைகள், அமெரிக்காவின் நிதி உதவியுடன் இயங்குகின்ற தொண்டு நிறுவனங்களின் செயற்பாடுகளை மட்டுப்படுத்தி இருப்பதாகவும் தெரிவிக்கப்படுகிறது. 

யு.எஸ்.எயிட் அமைப்பின் நிர்வாகி டெனிஸ் ரோலின்ஸ் இதனைத் தெரிவித்துள்ளார். அத்துடன் அபிவிருத்தி மற்றும் நிவாரண வேலைத்திட்டங்களுக்கு பதிலாக, இலங்கையில் ஜனநாயக அபிவிருத்தி வேலைத்திட்டங்களுக்கே உதவிகளை வழங்க தீர்மானித்திருப்பதாகவும் அவர் குறிப்பிட்டுள்ளார்.