கிளிநொச்சியில் மலக்குழி ஒன்றில் ஐந்துக்கும் மேற்பட்ட சடலங்கள் உள்ளமை கண்டறியப்பட்டுள்ளது. கிளிநொச்சி கணேசபுரத்தில் ஐ.நா அலுவலகம் அமைந்திருந்த காணிக்கு மிக அருகாக உள்ள ஒரு காணி ஒன்றின் மலக்குழி ஒன்றிலேயே இச் சடலங்கள் காணப்படுகின்றன.

சற்று முன்னர் கிடைத்த இந்தத் தகவல் தொடர்பில் மேலும் தெரியவருவதாவது:

குறித்த காணியினைத் துப்புரவு செய்யும் பணியில் ஈடுபட்டிருந்த தொழிலாளர்கள் மலக்குழியினை துப்புரவு செய்ய முற்பட்டவேளை அது நிரவப்பட்டிருந்த மணலினை வெளியெடுத்திருக்கின்றனர்.

அவ்வேளை குறித்த குளியினுள் கறுத்தப் பைகளால் முடிக்கட்டப்பட்ட நிலையில் பொதிகள் காணப்பட்டுள்ளன. அவற்றினை பிரித்துப் பார்த்தபோது பெண்களின் சலங்கள் காணப்பட்டிருக்கின்றன.

ஐந்துவரையான பொதிகள் இருப்பது உறுதி செய்யப்பட்டுள்ளபோதிலும் இன்னமும் அதிகமான சடலங்கள் அதே குழியினுள் இருக்கலாம் என அங்கு சென்ற மக்களால் அச்சம் வெளியிடப்பட்டுள்ளது. இது தொடர்பில் உடனடியாக படையினருக்கும், பொலிஸாருக்கும் அறிவிக்கப்பட்டிருக்கின்றது.

இவ் அறிவிப்பினை அடுத்து அங்கு சென்ற குறித்த தரப்பினை அங்கிருந்து அனைவரையும் வெளியேறுமாறு மிரட்டியிருக்கின்றனர். ஆனாலும் பெருமளவு மக்கள் திரண்டு அவற்றினைக் கண்ணுற்றதாகத் தெரியவருகின்றது.

இதேவேளை இன்று பிற்பகல் இச் சம்பவம் இடம்பெற்ற போதிலும் இன்று இரவு 7.30மணிவரை கிளிநொச்சி மாவட்ட நீதிபதிக்கு இச்சம்பவம் குறித்த முறைப்பாடு எதுவும் வழங்கப்படவில்லை என அங்கிருந்து கிடைக்கும் நம்பகரமான தகவல்கள் தெரிவிக்கின்றன.

இதன்அடிப்படையில் குறித்த சடலங்கள் இரவோடு இரவாக அங்கிருந்து அகற்றப்படலாம் என்ற அச்சநிலையும் எழுந்திருக்கின்றது.

மீள்குடியேற்ற நடவடிக்கைகள் தொடங்கிய காலப்பகுதியில் இதே கணேசபுரம் பகுதியில் கிணறு ஒன்றில் இருந்து இரண்டு பெண்களில் சடலங்கள் மீட்கப்பட்டிருந்தமை குறிப்பிடத்தக்கது.