தமிழகத்தில் வாழும் கன்னடர்கள் சிறைப்பிடிக்கப்படுவர் என்று சென்னை மாநகரத்தில் அதிமுக சார்பில் மிரட்டல் சுவரொட்டிகள் ஒட்டப்பட்டு உள்ளதாகத் தகவல் வெளியாகியுள்ளது.

ஜெயலலிதாவை இன்று ஜாமீனில் விடுவிக்கவில்லை என்றால், தமிழகத்தில் வாழும் கன்னடர்கள் அனைவரும் சிறைபிடிக்கப்படுவர் என்றும், இப்படிக்கு அதிமுகவை சேர்ந்த ஆயிரம் விளக்கு விஜய் என்றும், சென்னை மாநகரின் முக்கிய இடங்களில் சுவரொட்டிகள் ஒட்டப்பட்டு இது மிகவும் பரபரப்பை ஏற்படுத்தி உள்ளது. இதையடுத்து சென்னை மாநகர காவல்துறை ஆணையர் ஜார்ஜிடம் இது குறித்துப் புகார் அளிக்கப்பட்டதாவும் தெரிய வருகிறது.

இந்நிலையில்,அதிமுக தரப்பு இதை மறுத்துள்ளது. இருப்பினும் கர்நாடக காவல்துறை ஆணையர் சென்னை மாநகர காவல்துறை ஆணையரை தொலைப்பேசியில் தொடர்புக் கொண்டு சுவரொட்டிக் குறித்து கேள்வி எழுப்பி, பாதுகாப்புக் குறித்தும் கேட்டறிந்ததாகக் கூறப்படுகிறது. இங்கு வாழும் கன்னட மக்களுக்கு முறையான பாதுகாப்பு ஏற்பாடுகள் செய்யப்படும் என்று ஜார்ஜ் உறுதி அளித்ததாகவும் தகவல்கள் வெளியாகியுள்ளன.