மஹிந்த ராஜபக்ஷ அரசாங்கமும், அரசாங்கத்துடன் சேர்ந்திருக்கின்ற மேற்படி மு.அமைச்சரும், தமிழர்களின் உரிமைகளை மறைத்தும் – மறுத்தும்தான் கதை பேசுவார்கள் என்றும் அவர் குறிப்பிட்டுள்ளார்.
வடக்கு மாகாணத்துக்கு விஜயம் செய்த ஜனாதிபதி மஹிந்த ராஜபக்ஷவுடன் சேர்ந்து பயணித்த அமைச்சர் டக்ளஸ் தேவானந்தா கிளிநொச்சியில் பேசியபோது மு.விக்னேஸ்வரன் என்று விளித்திருந்தார். அத்துடன், மு.விக்னேஸ்வரன் என்றால் முட்டாள் விக்னேஸ்வரன் என்று அர்த்தமல்ல. முதலமைச்சர் விக்னேஸ்வரன் என்பதே என்றும் வியாக்கியானம் செய்திருந்தார். இந்த விடயம் குறித்துக் கருத்துத் தெரிவிக்கையிலேயே சி.சிறீதரன் மேற்கண்டவாறு கருத்து வெளியிட்டுள்ளார்.
அவர் மேலும் தெரிவித்துள்ளதாவது, “வடக்கு மாகாண சபையை சரியான ஆட்சி அதிகாரம் கொண்ட சபையாக நாம் கருதவில்லை. எனினும், மக்களின் ஆணையுடன் தமிழ்த் தேசியக் கூட்டமைப்பு இந்தச் சபையில் ஆட்சி அமைத்திருக்கின்றது.
ஆனால், இங்கு தமிழர்களின் ஆட்சியை விரும்பாதவர்கள் விமர்சிக்கின்றனர். குறிப்பாக வடக்குக்கு வந்த ஜனாதிபதியும் விமர்சித்தார். இதன்போது கீழ்த்தரமான வார்த்தைப் பிரயோகங்களையும் செய்தார். இதேபோன்று மு.அ. டக்ளஸ் தேவானந்தாவும் விமர்சித்திருக்கிறார்.
மு.அ.டக்ளஸ் தேவானந்தா என்று நான் கூறியமை முதுகெலும்பில்லாத அமைச்சர் என்று நான் சொல்ல வரவில்லை. முக்கிய அமைச்சர் என்றே கூறினேன். இப்படிப்பட்ட அமைச்சர்கள் தமிழர்களின் உரிமைகளை மறுத்துத்தான் கதைப்பார்கள் இவர்களால் அரசுக்கு அழுத்தம் கொடுக்க முடியுமா? இவர்களும் முன்னர் தமிழீழத்தையே கேட்டனர் பின்னர் 'மத்தியில் கூட்டாட்சி - மாநிலத்தில் சுயாட்சி' என்றனர். இப்போது அதுவும் இல்லை.
இந்நிலையில் இன்று அரசிடம் எதுவும் கேட்க முடியாமல் அரசு கொடுப்பதையும் கூறுவதையுமே வாங்கும், கேட்கும் நிலையில் இருக்கின்றனர். எமது மக்களால் நிராகரிக்கப்பட்ட இத்தகைய அமைச்சர்களின் குழுக்களை வைத்துக் கொண்டு எங்களை நசுக்குவதற்கு அரசு திட்டம் தீட்டிச் செயற்படுகின்றது” என்றுள்ளார்.
0 Responses to மு.அ. டக்ளஸ் தேவானந்தா என்பது முதுகெலும்பில்லாத அமைச்சர் என்று அர்த்தம் அல்ல: சி.சிறீதரன்