ஜனாதிபதித் தேர்தலுக்கான அறிவிப்பு நாளை 19ம் திகதிக்குப் பின்னர் எந்த வேளையிலும் வெளியிடப்படலாம் என்று எதிர்பார்க்கப்படுகின்றது. ஜனாதிபதி தேர்தல் ஜனவரி மாதம் முதல் வாரத்தில் நடத்தப்படுவது கிட்டத்தட்ட உறுதியாகிவிட்டது.
இந்த நிலையில் ஏட்டிக்குப்போட்டியான தேர்தல் பிரசாரங்களில் ஈடுபடுவதற்கு ஆளும் கட்சியான ஐக்கிய மக்கள் சுதந்திர முன்னணியும், பிரதான எதிர்க்கட்சியான ஐக்கிய தேசியக்கட்சியின் தலைமையிலான எதிரணியினரும் தயாராகிவிட்டனர்.
அரசாங்கத்தில் அங்கம் வகிக்கும் அமைச்சர்கள் மற்றும் தோழமைக் கட்சிகளின் தலைவர்கள் ஜனாதிபதித் தேர்தலுக்கான பிரசாரங்களில் தற்போதே ஈடுபட ஆரம்பித்து விட்டனர்.
ஐக்கிய மக்கள் சுதந்திர முன்னணியின் சார்பில் நாள்தோறும் கொழும்பிலுள்ள சிறிலங்கா சுதந்திரக்கட்சியின் அலுவலகத்தில் செய்தியாளர் மாநாடுகள் நடத்தப்படுகின்றன. தேர்தல் பிரசார அலுவலகங்கள் நாட்டின் பல இடங்களில் அரசாங்கத் தரப்பினரால் திறக்கப்பட்டுள்ளன.
ஜனாதிபதித் தேர்தலில் இனவாதப் பிரசாரத்தை முன்னிலைப்படுத்துவதற்கு அரசாங்கத் தரப்பினர் திட்டமிட்டுள்ளனரோ என்று சந்தேகிக்கத்தக்க வகையில் அமைச்சர்களின் கருத்துக்கள் வெளியிடப்படுகின்றன.
மத்திய கிழக்கு நாடுகளில் சீர்குலைத்தமையைப் போன்று இலங்கையிலும், அரசியல் ஸ்திரமற்ற நிலையை உருவாக்கி, தமது தேவையை நிறைவேற்றிக் கொள்ளும் தீவிர முயற்சியில் சர்வதேச சக்திகள் ஈடுபட்டுள்ளன.
இதற்காக தற்போதைய பொது அணியை இந்த சர்வதேச சக்திகள் பயன்படுத்திக் கொண்டிருக்கின்றன.
லிபியாவிலும் ஈராக்கிலும் மேற்கொண்ட அழிவுகளை இலங்கையிலும் மேற்கொள்வதற்கான முயற்சிகள் இடம்பெறுகின்றன.
ஏற்கனவே எமது நாடு அழிவைச் சந்தித்து விட்டது. எனவே தற்போதைய சூழ்ச்சிகளுக்கு இடமளிக்காது நாம் விழித்துக் கொள்ள வேண்டும் என்று ஐக்கிய மக்கள் சுதந்திர முன்னணியின் செயலாளரும் அமைச்சருமான சுசில் பிரேம்ஜயந்த கருத்துத் தெரிவித்திருக்கின்றார்.
கொழும்பில் நேற்று முன்தினம் இடம்பெற்ற செய்தியாளர் மாநாட்டில் கருத்துத் தெரிவித்த அமைச்சர்,
புலிகளின் முக்கிய மாநாடொன்று மலேசியாவில் இடம்பெற்றுள்ளது. இதில் தமிழ்த் தேசியக் கூட்டமைப்பின் உறுப்பினர்களும் கலந்து கொண்டுள்ளனர். இவ்வாறான பின்னணியில் நிறைவேற்று அதிகாரம் கொண்ட ஜனாதிபதி முறைமையை நீக்கக் கோருவதன் மூலம் எதிர்க்கட்சிகளின் நோக்கம் தெளிவாகின்றது.
வடக்கில் எவ்வாறு இராணுவ முகாம்களை அகற்ற முடியும். அங்கு புனர்வாழ்வு பெற்ற ஆயிரக்கணக்கான முன்னாள் போராளிகள் உள்ளனர் என்பதை மறந்துவிடக்கூடாது என்றும் அமைச்சர் பிரேம்ஜயந்த கூறியிருக்கின்றார்.
இதேபோல் அரசாங்கத்தின் ஆட்சிப் பீடத்திலிருந்து ஜனாதிபதி மஹிந்த ராஜபக்சவையும் பாதுகாப்பு கதிரையிலிருந்து கோத்தபாய ராஜபக்சவையும் வீழ்த்துவதற்கு பல சக்திகள் முயற்சி செய்கின்றன.
பொது எதிரணியின் பின்னணியில் புலம்பெயர் தமிழர்கள் மற்றும் விடுதலைப் புலிகளின் தூண்டுதலே உள்ளன.
எதிர்க்கட்சித் தலைவர் ரணில் விக்ரமசிங்க, சம்பந்தனின் நிகழ்ச்சி நிரலுக்கு அமையவே பொது எதிரணி களத்தில் குதிக்கின்றது என்று அரசாங்கத்தின் பங்காளிக் கட்சியான தேசிய சுதந்திர முன்னணியின் தலைவரும் அமைச்சருமான விமல் வீரவன்ச தெரிவித்திருக்கின்றார்.
பத்தரமுல்லையிலுள்ள தேசிய சுதந்திர முன்னணியின் தலைமையகத்தில் நேற்று முன்தினம் நடைபெற்ற செய்தியாளர் மாநாட்டில் கருத்துத் தெரிவிக்கையிலேயே அமைச்சர் விமல் வீரவன்ச இவ்வாறு கூறியிருக்கின்றார்.
தனி ஈழத்தினை உருவாக்கும் நோக்கத்தில் தற்போதைய ஆட்சியை கவிழ்க்க வேண்டும் என்ற முயற்சியில் புலம்பெயர் புலி ஆதரவாளர்கள் இங்குள்ள தமிழ் அரசியல் தலைமைகளுடன் கூட்டுச் சேர்ந்து செயற்படுகின்றனர்.
விடுதலைப் புலிகளை பழி வாங்கியமைக்காக பழி தீர்க்கும் புலி ஆதரவாளர்களின் திட்டத்திற்கு அமையவே தமிழ்த் தேசியக் கூட்டமைப்பு செயற்பட்டு வருகின்றது.
தமிழ், முஸ்லிம் வாக்குகள் முழுமையாக எதிரணிக்குச் சேரும்; சிங்கள வாக்குகளைப் பெற்றுக் கொண்டால் போதும் என்ற நம்பிக்கையில் பொது எதிரணி களத்தில் குதித்திருக்கின்றது.
இவர்களின் எதிர்பார்ப்பு வடக்கு, கிழக்கிற்கு ஏற்ற அரசாங்கத்தை அமைப்பதை தவிர முழு நாட்டிற்கான அரசாங்கம் அல்ல. எனவே சிங்கள பௌத்த மக்கள் இந்த சூழ்ச்சிக்கு ஏமாந்து விடக்கூடாது என்றும் அமைச்சர் விமல் வீரவன்ச செய்தியாளர் மாநாட்டில் கூறியுள்ளார்.
இவ்வாறு ஜனாதிபதித் தேர்தல் அறிவிப்பு வெளியாவதற்கு முன்னரே இனவாத நோக்கம் கொண்ட பிரசாரங்களை அமைச்சர்கள் ஆரம்பித்துள்ளனர்.
ஜனாதிபதித் தேர்தலில் வெற்றியைப் பெற்று விட வேண்டும் என்ற ஒரே நோக்கத்திற்காக இனவாதத்தைக் கக்கும் செயற்பாடுகள் ஆரம்பிக்கப்பட்டுள்ளமையையே அமைச்சர்களின் இந்தக் கருத்துக்கள் எடுத்துக்காட்டுகின்றன.
தமிழ்த் தேசியக் கூட்டமைப்பும் புலம்பெயர்ந்த தமிழர்களும் ஒன்றிணைந்து நாட்டுக்கு எதிராக சூழ்ச்சி செய்வதைப் போன்ற தோற்றப்பாட்டை உருவாக்கும் வகையிலேயே இத்தகைய கருத்துக்கள் அமைந்துள்ளன.
ஜனாதிபதி தேர்தலில் எத்தகைய முடிவினை எடுப்பது என்பது தொடர்பில் தமிழ் தேசியக் கூட்டமைப்பு இன்னமும் தீர்மானம் எதனையும் எடுக்கவில்லை.
தமிழ் தேசியக்கூட்டமைப்பின் ஆதரவை அரசாங்கமும் எதிரணியும் கோரியுள்ள போதிலும், இந்த விவகாரம் தொடர்பில் தமிழ் மக்களுடன் கலந்துரையாடி மனச்சாட்சிக்கு ஏற்றவகையில் தீர்மானம் எடுக்கப்படும் என்று கூட்டமைப்பின் தலைவர் இரா. சம்பந்தன் அறிவித்துள்ளார்.
எம்மைப் பயன்படுத்தி இனத் துவேசத்தைக் கிளப்பி தேர்தல் முடிவுகளை சாதகமாக்கிக் கொள்வதற்கு எவருக்கும் நாம் சந்தர்ப்பம் வழங்க மாட்டோம். ஜனாதிபதித் தேர்தலில் எத்தகைய முடிவினை எடுப்பது என்பது தொடர்பில் மக்களுடன் கலந்துரையாடி மனச்சாட்சியின் படி தீர்மானம் எடுப்போம் என்றும் சம்பந்தன் எம்.பி. தெரிவித்திருக்கின்றார்.
இந்த முறை ஜனாதிபதி தேர்தலில் ஜனாதிபதி மஹிந்த ராஜபக்சவை தமிழ் தேசியக்கூட்டமைப்பு ஆதரிக்க வேண்டும் என்று ஸ்ரீலங்கா சுதந்திரக் கட்சியின் தேசிய அமைப்பாளரும், பொருளாதார அபிவிருத்தி அமைச்சருமான பசில் ராஜபக்ச அழைப்பு விடுத்துள்ளார்.
இந்த அழைப்பினை கூட்டமைப்பின் தலைவர் இரா. சம்பந்தன் உடனடியாக நிராகரிக்காது அமைச்சரின் அழைப்பு தொடர்பில் ஆழமாக கவனத்தில் எடுக்கவுள்ளதாகக் குறிப்பிட்டிருக்கின்றார்.
ஜனாதிபதித் தேர்தலில் தமிழ் தேசியக் கூட்டமைப்பின் ஆதரவை அமைச்சர் பசில் ராஜபக்ச கோரியுள்ள நிலையில் அது குறித்து ஆழமாக பரிசீலிக்கப்படும் என்று சம்பந்தன் பதில் அளித்துள்ள சூழ்நிலையில் அரசாங்கத்தில் அங்கம் வகிக்கும் அமைச்சர்கள் மற்றும் கட்சிகளின் தலைவர்கள் கூட்டமைப்பை சம்பந்தப்படுத்தி இனவாதக் கருத்துக்களை தெரிவித்து வருகின்றனர்.
இத்தகைய செயற்பாடானது அரசாங்கத்தில் உள்ள அமைச்சர்கள் இருவேறு கோணங்களில் செயற்படுவதையும் எடுத்துக்காட்டுகின்றது.
உண்மையிலேயே அரசியல் சுயநலன்களுக்காக இனவாதக் கருத்துக்களை நாட்டில் மேலோங்கச் செய்வதானது தமிழ், சிங்கள சமூகங்கள் மத்தியில் மேலும் மேலும் முரண்பாடுகளையும் சந்தேகங்களையும் ஏற்படுத்துவதற்கே உதவும்.
கடந்த மூன்று தசாப்த காலமாக யுத்தத்தினால் பெரும் அழிவுகளை நாடு எதிர்நோக்கியிருந்தது.
தற்போது யுத்தம் முடிவுக்குக் கொண்டு வரப்பட்டுள்ள நிலையில் இரு சமூகங்களுக்கிடையேயும் நல்லிணக்கம் ஓரளவுக்காவது துளிர் விட ஆரம்பித்துள்ளது.
இத்தகைய நிலையில் நாட்டில் இடம்பெறும் தேர்தல் வெற்றிகளுக்காக இனவாதம் தூண்டப்படுவது ஏற்றுக்கொள்ளத்தக்க செயற்பாடல்ல.
எனவே ஜனாதிபதித் தேர்தலில் போட்டியிடும் எந்தத் தரப்பானாலும் தமது கொள்கைகள், கோட்பாடுகளை முன்னிலைப்படுத்தி பிரசாரங்களில் ஈடுபடவேண்டும்.
இதனைவிடுத்து, இனத் துவேசத்தைக் கிளப்பி பிரச்சாரங்களில் ஈடுபடுவதனால் நாட்டுக்கு நன்மை ஏற்படப் போவதில்லை.
இந்த விடயத்தில் ஆளும் கட்சியும் எதிர்க்கட்சிகளும் கவனம் செலுத்த வேண்டியது அவசியம் என்பதை வலியுறுத்த விரும்புகின்றோம்.
0 Responses to தேர்தல் வெற்றிகளுக்காக இனவாதம் தூண்டப்படுவது ஏற்றுக்கொள்ளத்தக்க செயற்பாடல்ல!