கிழக்கு மாகாண சபையில் புதிதாக பதவியேற்றுள்ள ஸ்ரீலங்கா முஸ்லிம் காங்கிரஸ் தலைமையிலான அரசாங்கத்தில் தமிழ்த் தேசியக் கூட்டமைப்பும் இணைந்து கொண்டுள்ளது. இதன்பிரகாரம், இரண்டு அமைச்சுப் பதவிகளையும் பெற்றுக் கொள்ளவுள்ளது.

இது தொடர்பில், ஸ்ரீலங்கா முஸ்லிம் காங்கிரஸூக்கும், தமிழ்த் தேசியக் கூட்டமைப்புக்கும் இடையில் கிழக்கு மாகாண முதலமைச்சர் ஹாபீஸ் நசீர் அஹமட் முன்னிலையில் ஒப்பந்தமொன்றும் கைச்சாத்திடப்பட்டுள்ளது.

தமிழ்த் தேசியக் கூட்டமைப்பு தலைமையின் அனுமதியுடன் தமிழ்த் தேசியக் கூட்டமைப்பு கிழக்கு மகாண சபை உறுப்பினர்களுக்கும், ஶ்ரீலங்கா முஸ்லிம் காங்கிரஸுக்குமிடையில் இடம்பெற்ற பேச்சுவார்த்தையின் பெறுபேறாகவே இந்த ஒப்பந்தம் கைச்சாத்திடப்பட்டுள்ளது.

தமிழ்த் தேசியக் கூட்டமைப்பின் சார்பில் கி. துரைராஜசிங்கமும் ஶ்ரீலங்கா முஸ்லிம் காங்கிரஸின் பொதுச் செயலாளர் ஹசன் அலியும் கொழும்பிலுள்ள ஶ்ரீலங்கா முஸ்லிம் காங்கிரஸ் தமைமையகத்தில் வைத்து இந்த ஒப்பந்தத்தில் கைச்சாத்திட்டுள்ளார்கள்.

குறித்த ஒப்பந்தத்தின் பிரகாரம் மாகாண அமைச்சர்கள் வாரியத்திலுள்ள ஐந்து அமைச்சுக்களில் இரு அமைச்சுப் பதவிகளை தமிழ்த் தேசிய கூட்டமைப்புக்கு வழங்க இணக்கம் காணப்பட்டுள்ளது.

மாகாண சபையின் துணை தவிசாளர் பதவியையும் தமிழ்த் தேசிய கூட்டமைப்புக்கு கிடைக்கும் வகையில் இரு தரப்பினருக்குமிடையிலான அந்த ஒப்பந்தம் செய்யப்பட்டுள்ளது.

அண்மையில் நடைபெற்று முடிந்த ஜனாதிபதித் தேர்தல் காலத்தில் ஶ்ரீலங்கா முஸ்லிம் காங்கிரஸ், ஐக்கிய மக்கள் சுதந்திரக் கூட்டமைப்புக்கான ஆதரவை விலக்கிக் கொண்டதன் காரணமாக கிழக்கு மாகாண சபையில் ஐக்கிய மக்கள் சுதந்திரக் கூட்டமைப்பு பெரும்பான்மையை இழந்து ஆட்சியையும் இழந்தது.

இந்தநிலையில் கிழக்கு மாகாண சபையில் புதிய ஆட்சியை ஶ்ரீலங்கா முஸ்லிம் காங்கிரசும் தமிழ்த் தேசிய கூட்டமைப்பும் இணைந்து அமைக்க கொள்கையளவில் இணக்கம் கண்டிருந்தனர். இருந்த போதிலும், முதலமைச்சர் பதவி தொடர்பான இழுபறி நிலை காரணமாக இரு தரப்பினருக்குமிடையிலான பேச்சுவார்தை தோல்வியில் முடிந்தது.

ஐக்கிய மக்கள் சுதந்திரக் கூட்டமைப்பின் புதிய தலைவராக தற்போதைய ஜனாதிபதி மைத்திரிபால சிறிசேன பதவியேற்றதையடுத்து, ஶ்ரீ லங்கா முஸ்லிம் காங்கிரஸ் மீண்டும் அந்த முன்னணியுடன் உறவை புதுப்பித்து முதலமைச்சர் பதவியையும் பெற்றுக் கொண்டது. இந்த விடயத்தில் ஶ்ரீலங்கா முஸ்லிம் காங்கிரஸ் நடந்து கொண்டவிதம் தமிழ்த் தேசியக் கூட்டமைப்பு தலைமையை பெரும் சீற்றத்திற்குள்ளாக்கியது.

தமிழ்த் தேசியக் கூட்டமைப்பு தலைமையினால் ஶ்ரீலங்கா முஸ்லிம் காங்கிரஸ் தலைமை கடுமையாக விமர்சிக்கப்பட்டது. பதிலாக அது குறித்து ஶ்ரீலங்கா முஸ்லிம் காங்கிரஸ் தலைமை அதிருப்தியையும் வெளியிட்டிருந்தது.

கிழக்கு மாகாண சபையின் முதலமைச்சர் பதவியை தமது கட்சி பொறுப்பேற்ற பின்பு, மாகாண ஆட்சியில் இணைந்து கொள்ளுமாறு, ஶ்ரீலங்கா முஸ்லிம் காங்கிரஸ் தலைவர் ரவூப் ஹக்கீம், தமிழ்த் தேசியக் கூட்டமைப்புக்கு பகிரங்கமாக அழைப்பு விடுத்திருந்தார் என்பது சுட்டிக்காட்டத்தக்கது.