வடக்கு மாகாண முதலமைச்சர் நிதியம் அமைப்பது தொடர்பிலான விடயம் சாத்தியமாகும் வாய்ப்புக்கள் காணப்படுகின்ற நிலையில், அதற்கு சமூக சேவை, சிறுவர் பாதுகாப்பு மற்றும் புனர்வாழ்வு ஆகிய அமைச்சுக்கள் அவசியமானவை என்பதால் அத்துறைகளை தான் மீண்டும் பொறுப்பேற்றுள்ளதாக வடக்கு மாகாண முதலமைச்சர் சி.வி.விக்னேஸ்வரன் தெரிவித்துள்ளார்.

வடக்கு மாகாண சபை ஆரம்பிக்கப்படும் போது முதலமைச்சரின் கீழ் இருந்த சமூக சேவை, சிறுவர் பாதுகாப்பு மற்றும் புனர்வாழ்வு ஆகிய துறைகள், இரண்டு வருடங்களுக்கு முன்னர்; சுகாதார அமைச்சர் ப.சத்தியலிங்கத்தின் கீழ் கொண்டுவரப்பட்டன. இந்நிலையில், குறித்த மூன்று அமைச்சுகளையும் வடக்கு மாகாண ஆளுநர் ரெஜினோல்ட் குரே முன்னிலையில் திங்கட்கிழமை மாலை 06.30 மணியளவில் முதலமைச்சர் மீளப்பொறுப்பேற்றார்.

அமைச்சுகளை பொறுப்பேற்ற பின்னர் முதலமைச்சர் கருத்து தெரிவிக்கையில், 'இந்த மூன்று துறைகளையும் நிர்வகிக்க முடியாத நிலையில் சுகாதார அமைச்சரிடம் கையளித்திருந்தேன். தற்போதுள்ள எனது செயலாளர் மற்றும் அதிகாரிகள் இந்தத் துறைகளில் நிபுணத்துவம் பெற்றவர்களாக உள்ளமையினால், அதனை நான் மீள பெற்றுக் கொண்டிருக்கின்றேன்.

காணி விடயம் மற்றும் மீள்குடியேற்ற விடயத்தை நாம் வைத்துக் கொண்டு புனர்வாழ்வை வேறு அமைச்சரிடம் விடுவதனால் திறமையாக செயற்பட முடியாமல் சில நடைமுறை சிக்கல்கள் காணப்படுகின்றன. இவ்வாறான காரணங்களினாலேயே இந்த அமைச்சு துறைகளை நான் மீள பெற்றுக் கொண்டிருக்கின்றேன். வேறு காரணங்கள் எவையும் இல்லை.' என்றுள்ளார்.