தேசத்தின் விடுதலைக்காக உண்ணா நோன்பிருந்து தன் உயிர்தந்த தியாகச்சுடர் அன்னைபூபதி அம்மா அவர்களின் 26வது ஆண்டு நினைவினை முன்னிட்டு நடாத்தப்பட்ட 18ம் ஆண்டு விளையாட்டுப் போட்டிகள், 31.05.2014 சனிக்கிழமை அன்று லவுசான் மாநிலத்தில் Dorigny மைதானத்தில் சிறப்பாக நடைபெற்றது.

சுவிஸ் தமிழர் ஒருங்கிணைப்புக் குழுவினரின் ஏற்பாட்டில், விளையாட்டுத்துறையினரால் நடாத்தப்பட்ட விளையாட்டுப் போட்டிகளானது பொதுச்சுடரேற்றலுடன், தமிமீழத் தேசியக்கொடி ஏற்றி வைக்கப்பட்டதனைத் தொடர்ந்து ஈகைச்சுடரேற்றல், அகவணக்கத்துடன் ஆரம்பமானது.

எதிர்கால சந்ததியினரிடம் தமிழ்த்தேசிய உணர்வை, ஒற்றுமையை பேணிப் பாதுகாக்கவும், தாயகம் நோக்கிய தேடலை உண்டுபண்ணும் நோக்கிலும் ஒழுங்கமைக்கப்பட்ட இவ் விளையாட்டுப் போட்டியில்; உதைபந்தாட்டம், துடுப்பாட்டம், கரப்பந்தாட்டம், மெய்வன்மையாளர் போட்டிகள், பார்வையாளர் போட்டிகள் போன்ற அனைத்து விதமான போட்டிகளும் ஆரம்பிக்கப்பட்டு விறுவிறுப்பாக நடைபெற்றதுடன்  பல விளையாட்டுக்கழகங்களைச் சேர்ந்த நூற்றுக்கணக்கான போட்டியாளர்கள் பங்குபற்றியிருந்தமையும் குறிப்பிடத்தக்கதாகும்.

வளர்ந்தோருக்கான உதைபந்தாட்டத்தின் இறுதியாட்டத்தில் பேர்ண் றோயல்  விளையாட்டுக்கழகம் 2-0 என தாய்மண் விளையாட்டுக்கழகத்தினை தனது சிறப்பான ஆட்டத்தினால் வென்றது. மென்பந்து துடுப்பாட்ட இறுதிப்போட்டியில் வித்தியா விளையாட்டுக்கழகம் பாசல் (89), சன்தீஸ் விளையாட்டுக் கழகம் செங்காலன் (52) என்ற ஓட்டங்களைப் பெற்று தனது அதிரடி ஆட்டத்தின் மூலம் வித்தியா விளையாட்டுக்கழகம் பாசல் வெற்றியீட்டியது. 5பேர் கொண்ட கரப்பந்தாட்ட இறுதிப்போட்டியில்  லவுசான் புளுஸ்ரார் சி, எ விளையாட்டுக்கழகங்கள் மோதிக் கொண்டதில் லவுசான் புளுஸ்ரார் சி விளையாட்டுக்கழகம் வெற்றி பெற்றது. 

வெற்றி பெற்ற வீரர்களுக்கும், கழகங்களைச் சேர்ந்த வீரர்களுக்கான பதக்கங்களும், வெற்றிக்கிண்ணங்களும் வழங்கி மதிப்பளிக்கப்பட்டதனைத் தொடர்ந்து  தமிமீழத் தேசியக்கொடி இறக்கப்பட்டு தமிழர்களின் தாரக மந்திரமான தமிழரின் தாகம் தமிழீழத் தாயகம் என்ற கோசத்துடன் போட்டிகள் நிறைவடைந்தன. இவ் விளையாட்டுப்போட்டிகள் சிறப்பாக நடைபெற உதவிய அனைவருக்கும் எமது நன்றியினையும், பாராட்டுதல்களையும் தெரிவித்துக் கொள்கின்றோம்.