இலங்கை இராணுவத்தில் பணி புரிந்த மற்றும் கப்டன் தரத்தில் இருந்த உயர் அதிகாரி ஒருவர் கடத்தப்பட்டுள்ளார் என்ற சம்பவம் தற்போது வெளியாகியுள்ளது. 2003ம் ஆண்டு இலங்கை இராணுவத்தில் ஒரு பிரிவின் கப்டனாகப் பணி புரிந்த விக்கிரமசிங்க என்பரே இவ்வாறு கடத்தப்பட்டுள்ளார். 51 வயதுடைய இவர் 2 பிள்ளைகளின் தந்தையும் ஆவார். சம்பவ தினமன்று இவரைத் தொடர்புகொண்ட சிலர் பெனாண்டோ என்று அழைக்கப்படும் இவரது நண்பரின் பெயரைச் சொல்லி இவருடன் தொலைபேசியில் பேசியுள்ளனர். தன்னை பார்க்க தம்புள்ளை வருமாறு பெனாண்டோ கூறியது போலவே இவரிடம் கூறியுள்ளனர். இதனை நம்பிய விக்கிரம்சிங்க அது ஒரு பொறி என்று தெரியாமல் அங்கே சென்றுள்ளார். சென்ற அவரை வெள்ளைவான் கடத்திச் சென்றுள்ளது.

இவ்வாறு கடத்திச் செல்லப்பட்ட விக்கிரமசிங்கவை ஒட்டுக்குழுக்கள் சுமார் 11 நாட்கள் வைத்திருந்திருக்கிறார்கள். விக்கிரமசிங்கவை அவர்கள் கடுமையாகத் தாக்கி சித்திரவதை செய்துள்ளனர். துப்பாக்கியால் சுட்டுவிடுவோம் என மிரட்டி உள்ளனர். விக்கிரமசிங்க தன்னச் சுடும்படி அக் குழுவிடம் கூறியுள்ளார். உங்கள் சித்திரவதைகளை தாங்கும் சக்தி எனக்கு இல்லை எனவே என்னைச் சுட்டுவிடுங்கள் என அவர் மன்றாடியுள்ளார். அதன் பின்னர் அவர்கள் தமிழில் ஒரு கடிதத்தைக் கொடுத்து அதனை சிங்களத்தில் மொழிபெயர்த்து எழுதும் படி கூறியதோடு அதில் கையொப்பமிடுமாறும் கோரியுள்ளனர். இதன் பின்னர் ஒட்டுக்குழுவினர் விக்கிரமசிங்கவை CஈD பொலிசாரிடம் கையளித்துள்ளனர்.

விக்கிரமசிங்க பின்னர் 4ம் மாடிக்கு மாற்றப்பட்டுள்ளார். இதன் பின்னரே அவரது மனைவிக்கு விடையம் தெரிந்துள்ளது. ஏன் தனது கணவரைக் கைதுசெய்து வைத்திருக்கிறீர்கள் என மனைவி கேட்டபோது நீங்கள் விடுதலைப் புலிகளுக்கு உதவினீர்களா என சற்றும் சம்பந்தம் இல்லாத கேள்விகளைக் கேட்டு இரகசியப் பொலிசார் அவர் வாயை அடைத்துள்ளனர். அதாவது மேலதிகமாக ஏதாவது கதைத்தால் விக்கிரமசிங்கவின் நிலைதான் அவர் மனைவிக்கும் வரும் என்பதனை அவர்கள் சொல்லாமல் சொல்லி இருக்கிறாரகள் அவ்வளவுதான். 4ம் மாடியில் வைத்து பல படிவங்களில் கையெழுத்தை வாங்கிக்கொண்டு விக்கிரமசிங்கவை 2009ம் ஆண்டு அவர்கள் நீதிமன்றின் முன் நிறுத்தியுள்ளனர். பின்னர் 2010ம் ஆண்டு அவர் போகம்பாற சிறைச்சாலைக்கு மாற்றப்பட்டுள்ளார்.

இதுவரை நாம் அவர் எப்போது கடத்தப்பட்டார் என்பதனை இங்கே குறிப்பிடவில்லை. அவர் 26ம் திகதி யூன் மாதம் 2006ம் ஆண்டு தம்புல்லையில் வைத்து வெள்ளை வேனில் கடத்தப்பட்டார். அன்று முதல் சுமார் 4 வருடங்கள் அவர்மேல் எந்தக் குற்றப்பத்திரிகையும் தாக்கல் செய்யப்படவில்லை. அவர் எந்த நீதிமன்றத்துக்கும் கொண்டுசெல்லப்படவில்லை. இன்றுவரை அவர் மேல் எந்த ஒரு குற்றப்பத்திரிகையும் தாக்கல் செய்யப்படவில்லை என்பது பெரும் அதிர்ச்சி தருவதாக ஆசிய மனித உரிமை அமைப்பு பெரும் கண்டனத்தை வெளியிட்டுள்ளது. குற்றஞ்சுமத்தப்படாமலே பல வருடங்களாக இவர் சிறையில் இருக்கிறார். அவ்வாறு ஒருவரை தொடர்ந்து சிறையில் வைத்திருக்க இலங்கை நீதிமன்றம் எவ்வாறு அனுமதி கொடுத்தது என அதில் கேள்வி எழுப்பப்பட்டுள்ளது. குற்றம் இருப்பின் அதனைத் தாக்கல் செய்யலாம் இல்லையேல் அவரை விடுதலை செய்யவேண்டும் என ஆசிய மனித உரிமை கழகம் தனது அறிக்கையில் சுட்டிக்காட்டியுள்ளது.

முன் நாள் இராணுவக் கப்டனுக்கே இலங்கையில் இந்த நிலை என்றால் சாதாரன பொதுமக்களின் அதுவும் தமிழர்களின் நிலை என்னவாக இருக்கும் என்ற கேள்விகள் தற்போது மேலோங்கியுள்ளது. ஆசிய மனித உரிமைக் கழகம் இந்த வழக்கு தொடர்பாக வெளிப்படையாகவே தனது கருத்தை வெளியிட்டுள்ளது வரவேற்க்கத்தக்க விடையமாகும்.

SOURCE: http://www.scoop.co.nz/stories/WO1112/S00726/sri-lanka-senior-army-officer-arbitrarily-arrested.htm

அதிர்வு