கும்மிடிப்பூண்டி பாதிரிவேடு அரசு மேல்நிலைப்பள்ளி பிளஸ் 1 படிக்கும் மாணவர்கள் சக மாணவிகளுடன் நட்பாக பழகி அவர்களை செல்போனில் படம் எடுத்து இன்டர்நெட்டிலும், செல்போன்களிலும் பரவ விட்டனர்.

பள்ளி விடுமுறை நாளில் மாணவர்கள் இந்த விளையாட்டில் ஈடுபட்டனர். மாணவியை, மாணவர் ஒருவர் சுற்றிச் சுற்றி வந்து கிண்டல் செய்வது, மடியில் படுப்பது போன்ற சில்மிஷங்கள் செய்துள்ளனர். இதை 4 மாணவர்கள் சுற்றி நின்று செல்போனில் படம் எடுத்து இருக்கிறார்கள். இதுபோல் பல காட்சிகள் இடம் பெற்று இருந்தன.

5 மாணவர்களும் இதுபோல் 2 மாணவியை ஆபாச படம் எடுத்து செல்போனில் பரவவிட்டனர். இதுபற்றி பள்ளி நிர்வாகத்துக்கு தெரிய வந்ததும் அதிர்ச்சி அடைந்தனர். மாணவிகளை செல்போனில் படம் எடுத்த மாணவர்கள் கங்கா (மா நல்லூர்), சுமன் (பாதிரிவேடு), கார்த்திக் (செதில்பாக்கம்), செல்வகுமார், தங்கராஜ் ஆகிய 5 மாணவர்களை பள்ளியை விட்டு நீக்கி டி.சி. கொடுத்து அனுப்பினர்.

இந்த ஆபாச பட விவகாரத்தில் சிக்கிய 2 மாணவிகளில் ஒருவரான திலகவதி கடந்த 21 ந்தேதி செதில்பாக்கத்தில் உள்ள தனது வீட்டில் தூக்கில் பிணமாக தொங்கினார். உடனே போலீசார் சென்று விசாரணை நடத்தினர்.

மாணவியின் தந்தை குமார் போலீசில் கூறும் போது, மாணவர்கள் ஆபாச படம் எடுத்ததால் தனது மகள் திலகவதி அவமானம் தாங்காமல் தற்கொலை செய்து கொண்டதாக தெரிவித்தார். போலீசார் அங்கு செல்லும் முன் மாணவியின் பிணத்தை கீழே இறக்கி வைத்திருந்தனர். இது போலீசாருக்கு சந்தேகத்தை ஏற்படுத்தியது.

மாணவி பிணத்தை கைப்பற்றி பிரேத விசாரணைக்காக அரசு ஆஸ்பத்திரிக்கு அனுப்பி வைத்தனர். பிரேத பரிசோதனைக்கு பின் மாணவி உடல் உறவினர்களிடம் ஒப்படைக்கப்பட்டது. ஆனால் சம்பந்தப்பட்ட மாணவர்கள் மீது நடவடிக்கை எடுக்க கோரி உறவினர்கள் பிணத்தை வாங்க மறுத்து சாலை மறியலில் ஈடுபட்டனர்.

போலீஸ் அதிகாரிகள் சென்று அவர்களை சமாதானப்படுத்தினார்கள். இதற்கிடையே இந்த விவகாரத்தில் திடுக்கிடும் திருப்பம் ஏற்பட்டது. பிரேத பரிசோதனை அறிக்கையில் மாணவியின் கழுத்து எலும்பு முறிக்கப்பட்டு இருக்கிறது, எனவே கழுத்தை நெரித்து கொலை செய்யப்பட்டதற்கான சந்தேகம் உள்ளது என்று தெரிவிக்கப்பட்டு இருந்தது.

அதன் பேரில் கொலை கண்ணோட்டத்தில் போலீசார் விசாரணையை முடுக்கி விட்டனர். மாணவியின் தந்தை குமார் மற்றும் உறவினர்களிடம் தீவிர விசாரணை நடத்தினார்கள். அப்போது திலகவதியின் ஆபாச படம் வெளியானதால் அவமானம் அடைந்து சித்தப்பா ஹரிதான் கழுத்தை நெரித்து கொன்றதாக தெரிய வந்தது. போலீசார் ஹரியை தேடினார்கள்.

அவர் தலைமறைவாகி விட்டது தெரிய வந்தது. பல இடங்களில் தேடி போலீசார் ஹரியை பிடித்தனர். இரவோடு இரவாக பாதிரிவேடு போலீஸ் நிலையம் அழைத்து வந்து விசாரணை நடத்தினார்கள். குடும்ப மானத்தை காப்பாற்ற திலகவதியை கவுரவ கொலை செய்ததை ஹரி ஒப்புக் கொண்டார்.

இன்று காலை அவரிடம் டி.எஸ்.பி. குமார் விசாரணை நடத்தினார்கள். இதையடுத்து அவர் கைது செய்யப்பட்டார். மாணவியை கொன்றது ஏன் என்பது குறித்து பரபரப்பு வாக்குமூலம் கொடுத்தார். இதற்கிடையே இந்த விவகாரம் வெளியானதும் சம்பந்தப்பட்ட 5 மாணவர்களும் ஆந்திராவுக்கு தப்பி ஓடி விட்டனர்.

அவர்களைப் பிடிக்க போலீஸ் சூப்பிரண்டு வனிதா உத்தரவின் பேரில் தனிப்படை போலீசார் ஆந்திரா விரைந்தனர். விசாரணையில் மாணவர்கள் 5 பேரும் அங்கு லாரிகளில் கிளீனராக பணிபுரிந்து வருவது தெரிய வந்தது. இதையடுத்து போலீசார் அங்கு முகாமிட்டு கங்கா, சுமன், கார்த்திக் ஆகிய 3 மாணவர்களை கைது செய்தனர்.

செல்வகுமார், தங்கராஜ் ஆகியோர் தொடர்ந்து தலைமறைவாக இருக்கிறார்கள். கைதான 3 மாணவர்களும் 17 வயதுக்குட்பட்டவர்கள் என்பதால் போலீசார் அவர்களை சென்னை கெல்லீசில் உள்ள சிறுவர் சீர்திருத்தப் பள்ளியில் அடைத்தனர்.