சசிகலா மீதான கட்சியின் ஒழுங்கு நடவடிக்கையை ரத்து செய்து அவரது விளக்கத்தை ஏற்றுக் கொள்வதாக ஜெயலலிதா அறிவித்துள்ளார். எனினும் நடராஜன் மற்றும் திவாகரன் உள்ளிட்டோர் மீதான நடவடிக்கையில் மாற்றம் இல்லை என்றும் ஜெயலலிதா தெரிவித்துள்ளார்.
தவறு செய்த உறவினர்ளுடன் தமக்கு இருந்த உறவைத் துண்டித்து விட்டதாக சசிகலா தான் விடுத்திருந்த அறிக்கை ஒன்றில் தெரிவித்திருந்தார்.

அதிமுகவில் இருந்து விலக்கி வைக்கப்பட்டிருந்த சசிகலா மீதான ஒழுங்கு நடவடிக்கை ரத்து செய்யப்படுவதாக முதல்வர் ஜெயலலிதா அறிவித்துள்ளார். சசிகலா அளித்த விளக்கத்தை ஏற்றுக் கொண்டதாகவும் அவர் கூறியுள்ளார்.

முதல்வர் ஜெயலலிதாவின் தோழி சசிகலா, அவரது கணவர் நடராஜன் உள்ளிட்ட குடும்பத்தினர் அனைவரும் கடந்த டிசம்பர் 19ஆம் திகதி அதிமுகவில் இருந்து அதிரடியாக நீக்கப்பட்டனர். அதன்பிறகு நடராஜன், ராவணன், திவாகரன் உட்பட சிலர் கைது செய்யப்பட்டு சிறையில் அடைக்கப்பட்டனர்.

இந்நிலையில், கடந்த 28ஆம் திகதி, சசிகலா திடீரென ஒரு அறிக்கை வெளியிட்டார். அதில், ‘ஜெயலலிதாவுக்கு கனவிலும் நான் எந்த துரோகமும் நினைக்கவில்லை. அவருக்கு துரோகம் செய்தவர்களுடனான தொடர்பை துண்டித்து விட்டேன்’ என்று கூறியிருந்தார்.

சசிகலா விளக்கத்தை ஏற்று அவர் மீதான ஒழுங்கு நடவடிக்கை ரத்து செய்வதாக ஜெயலலிதா இன்று அறிவித்துள்ளார். அதே நேரத்தில் நடராஜன், டி.டி.வி.தினகரன், திவாகரன், மகாதேவன், தோட்டக்கலை கிருஷ்ணமூர்த்தி, ராவணன், தங்கமணி, அடையாறு மோகன், சுந்தரவதனம் உள்ளிட்டவர்கள் மீது எடுக்கப்பட்ட ஒழுங்கு நடவடிக்கையில் எந்த மாற்றமும் இல்லை என்றும் ஜெயலலிதா தெரிவித்துள்ளார். ஒழுங்கு நடவடிக்கை ரத்து செய்யப்பட்டதையடுத்து, அதிமுக உறுப்பினராக சசிகலா நீடிப்பார் என எதிர்பார்க்கப்படுகிறது