திருகோணமலை சம்பூர் பிரதேச மக்களின் மீள்குடியேற்றம் தொடர்பாக கிழக்கு மாகாண முதலமைச்சர் ஒஸ்ரின் பெர்ணான்டோ, நேற்று ஞாயிற்றுக்கிழமை சம்பூர் பிரதேசத்துக்கு நேரடியாகச் சென்று ஆராய்ந்துள்ளார்.

கிழக்கு மாகாண ஆளுநருடன், திருகோணமலை மாவட்ட அரசாங்க அதிபர் ரஞ்சித் டி சில்வா உள்ளிட்ட அதிகாரிகளும், சம்பூர் பிரதேச மக்களும் சென்றிருந்தனர்.

சம்பூர் பிரதேசத்தை பார்வையிட்ட ஆளுநர், இடைத்தங்கல் முகாம்களில் தங்கியுள்ள மக்களை சந்தித்து அவர்களது பிரச்சினைகள் மற்றும் எதிர்பார்ப்புகள் தொடர்பாகவும் கேட்டறிந்துள்ளார்.

இடைத்தங்கல் முகாம்களில் 9 ஆண்டுகளாக தங்கியுள்ள தங்களை நேரில் வந்து சந்தித்து பிரச்சனைகளை கேட்டறிந்த முதலாவது ஆளுநர் என்று கூறிய மக்கள், தங்களது விரைவான மீள்குடியேற்றத்தின் அவசியத்தை அவரிடம் வலியுறுத்தினர்.

சம்பூர் பிரதேசத்தில் அமைந்துள்ள கடற்படை முகாம், முதலீட்டு வலயத்திற்கான காணிகள் அடையாளமிடப்பட்டுள்ளமை மற்றும் உத்தேச அனல் மின்நிலையம் போன்ற காரணங்களினாலேயே இந்த பிரதேச மக்களின் மீள்குடியேற்றம் தடைப்பட்டுள்ளது.

கடற்படை முகாமை அகற்றுதல் அல்லது வேறு இடத்தில் அமைத்தல் அல்லது அதன் பரப்பை சுருக்குதல் உள்ளிட்ட கோரிக்கைகளை முன்வைத்தபோது, அது பாதுகாப்பு அமைச்சுடன் தொடர்புடைய விடயம் என ஆளுநரால் பதில் அளிக்கப்பட்டதாக கிழக்கு மாகாண சபை உறுப்பினர் குமாரசாமி நாகேஸ்வரன் தெரிவித்துள்ளார்.

அனல்மின் உற்பத்தி நிலையத்திற்கு என அடையாளமிடப்பட்டுள்ள காணியின் அளவை குறைத்தல், உத்தேச முதலீட்டு ஊக்குவிப்பு வலயத்தை மீளாய்வு செய்தல் போன்ற முன்னெடுப்புகளின் மூலமும் மீள்குடியேற்றத்தை மேற்கொள்ள முடியும் என்று மக்களால் ஆளுநரின் கவனத்திற்கு கொண்டு வரப்பட்டுள்ளது.

இதற்கு பதில் அளித்த ஆளுநர் ஒஸ்ரின் பெர்ணான்டோ, மக்களின் எதிர்பார்ப்புகள் மற்றும் கோரிக்கைகள் தொடர்பில் அறிக்கையொன்று எதிவரும் செவ்வாய்கிழமை ஜனாதிபதி மைத்திரிபால சிறிசேனவிடம் கையளிக்கப்படும் என கூறியதாகவும் குமாரசாமி நாகேஸ்வரன் பி.பி.சி.யிடம் தெரிவித்துள்ளார்.