பிரபல ரவுடி என்று சொல்லப்படும் சோட்டா ராஜனுக்கு உடல் நிலை சரியில்லை என்று திஹார் சிறை நிர்வாகம் தெரிவித்துள்ளது.

கொள்ளை,ஆட்கடத்தல், போதைப்பொருள் கடத்தல் என்று பல்வேறு குற்றங்கள் செய்தவர் மற்றும் பிரபல கடத்தல் மன்னன் தாவூத் இப்ராஹிம் கூட்டாளி என்று சொல்லப்படும் சோட்டா ராஜன் திஹார் சிறையில் உள்ளார். கடந்த வருடம் நவம்பர் மாதம் இந்தோனேஷியா பாலித் தீவில் கைது செய்யப்பட்டவர் சோட்டா ராஜன்.

திஹார் சிறையில் இருக்கும் இவருக்கு நீரிழிவு மற்றும் இதய நோய் இருப்பதாக திஹார் சிறை அதிகாரிகள் தெரிவித்துள்ளனர். எனவே, இவருக்கு சிகிச்சை அளிக்கும் அளவுக்கு சிறையில் வசதிகள் இல்லை என்பதால், சோட்டா ராஜனை நவீன மருத்துவமனையில் அனுமதித்து சிகிச்சை அளிக்க அனுமதி அளிக்க வேண்டும் என்று சிறை நிர்வாகம் டெல்லி நீதி மன்றத்தில் மனுத் தாக்கல் செய்துள்ளது.மனுவை நீதிமன்றம் வருகிற 30ம் திகதி விசாரிக்கும் என்று தெரிய வருகிறது.