தமிழ்த் தேசியக் கூட்டமைப்பின் முன்னாள் பாராளுமன்ற உறுப்பினர் பா.அரியநேத்திரனிடம் குற்றப் புலனாய்ப்புப் பிரிவு பொலிஸார் நேற்று திங்கட்கிழமை விசாரணை நடத்தியுள்ளனர்.

கொழும்பு குற்றப் புலனாய்வுத் தலைமயகத்தில் நடைபெற்ற இந்த விசாரணையில், 2004ஆம் ஆண்டு பாராளுமன்ற தேர்தலில் மட்டக்களப்பு மாவட்டத்திலிருந்து தமிழ்த் தேசிய கூட்டமைப்பு சார்பில் தேர்வாகியிருந்த கிங்ஸிலி இராசநாயகம் படுகொலை தொடர்பாக தான் விசாரிக்கப்பட்டதாக பா.அரியநேத்திரன் தெரிவித்துள்ளார்.

2004ஆம் ஆண்டு தொடக்கம் முதல் 2015ஆம் ஆண்டு வரை மட்டக்களப்பு மாவட்ட பாராளுமன்ற உறுப்பினராக பதவி வகித்த பா.அரியநேத்திரன், 2004ஆம் ஆண்டு தேர்தலில் விருப்பு வாக்குகள் அடிப்படையில் தேர்வாகவில்லை. விருப்பு வாக்கு அடிப்படையில் தமிழ்த் தேசிய கூட்டமைப்பு சார்பில் நான்கு பாராளுமன்ற உறுப்பினர்களில் ஒருவராக கிங்ஸிலி இராசநாயகம் தேர்வான போதிலும், அவர் பதவிப் பிரமாணம் செய்யாமலே ஒரு சில நாட்களில் பதவியை இராஜினாமா செய்தார்.

விடுதலைப் புலிகளின் அச்சுறுத்தல் மற்றும் அழுத்தங்கள் காரணமாகவே அவர் இராஜினாமா செய்து கொண்டதாக அவ்வேளையில் அரசியல் வட்டாரங்களில் பேசப்பட்டது. அந்த வெற்றிடத்திற்கு விருப்பு வாக்குகள் அடிப்படையில் அடுத்த இடத்திருந்த பா.அரியநேத்திரன் பாராளுமன்ற உறுப்பினராக பதவிப் பிரமாணம் செய்து கொண்டார்.

கிங்ஸ்லி இராசநாயகம் பதவியை இராஜினாமா செய்த ஆறு மாதங்களுக்கு பிறகு, ஒக்டோபர் 19ஆம் திகதியன்று மட்டக்களப்பு புறநகர் பகுதியிலுள்ள அவரது காணியை பார்வையிட சென்றிருந்த போது சுட்டுக் கொல்லப்பட்டார். இந்த கொலைக்கு விடுதலைப் புலிகள் தான் பொறுப்பு என ஏற்கனவே அவரது குடும்பத்தினரால் தெரிவிக்கப்பட்டிருந்தது.

2004க்கு முற்பட்ட காலத்தில் விடுதலைப் புலிகள் அமைப்புடன் நெருக்கமான தொடர்புகளை கொண்டிருந்ததாக கூறப்படும் கிங்ஸ்லி இராசநாயகம், தமிழர் புனர்வாழ்வு கழகத்திலும் பொறுப்பான பதவிகளை வகித்துள்ளார். கிழக்கு மாகாணத்தில் 2004ஆம் ஆண்டில் விடுதலைப் புலிகள் அமைப்பில் ஏற்பட்ட பிளவின் பின்னர், அவர் கொண்டிருந்த நிலைப்பாடு காரணமாக அந்த அமைப்பினால் அவர் சுட்டுக் கொல்லப்பட்டதாகவும் கூறப்படுகின்றது.