தீயில் சங்கமமாகி தமிழர்களுக்காய் தன் உயிர்க் கொடை செய்த வீரத்தமிழ்மகன் தங்கவேல் விஜயராஜிக்கு நினைவு வணக்க நிகழ்வு பிரித்தானியாவில் நேற்று நடைபெற்றது.

வடமேற்கு லண்டன் பகுதியில் அமைந்துள்ள புறோக்சைட் கொமியூனிட்டி சென்ரர் மண்டபத்தில் மாலை 7:00 மணி முதல் 9:00 மணிவரை பிரித்தானியத் தமிழர் ஒன்றியத்தின் ஏற்பாட்டில் இந்நிகழ்வு நடைபெற்றது.

நிகழ்வில் ஈகச்சுடரினை மூன்று மாவீரர்களின் சகோதரனான கிருபா ஏற்றிவைத்தார். ஈகச்சுடர் விஜயராஜின் திருவுருவப்படத்திற்கான மலர்மாலையினை மூன்று மாவீரர்களின் சகோதரனும், நாடுகடந்த தமிழீழ அரசாங்கத்தின் மாவீரர் குடும்பநலன் பேணல் அமைச்சருமான சேகர் அணிவித்தார். தொடர்ந்து அகவணக்கமும், மலர் வணக்கமும் இடம்பெற்றது.

இந் நிகழ்வில் நினைவுரைகளை தமிழகத்தைச் சேர்ந்த என். அரசு என்பவரும் நாடுகடந்த தமிழீழ அரசாங்கத்தின் பாராளுமன்ற உறுப்பினரான நிமலனும் பிரித்தானிய தமிழர் ஒன்றியத்தைச் சேர்ந்த மாறனும் நிகழ்த்தினர்.

அத்தோடு இந்நிகழ்வில் வீரத்தமிழ்மகன் தங்கவேல் விஜயராஜிக்கு பிரித்தானியத் தமிழர் ஒன்றியத்தால் கடந்த 19ஆம் திகதி வெளியிடப்பட்ட இரங்கல் அறிக்கையும் வாசிக்கப்பட்டது.

நிகழ்வின் இறுதியாக விலைமதிப்பற்ற உயரிய உயிரை தீயிற்கு இரையாக்கும் போராட்டங்களை தவிர்த்து, உலகமே வியக்கும் விதத்தில் வெவ்வேறு வடிவங்களில் எம்முள் உள்ள ஆற்றலை வைத்து தமிழீழ விடுதலைப் போரை நடாத்துவோம் என உறுதி எடுக்கப்பட்டதாக பிரித்தானிய தமிழர் ஒன்றியம் தனது அறிக்கையில் தெரிவித்துள்ளது.