முன்னாள் பிரதமர் ராஜீவ் காந்தி கொலை வழக்கில் தூக்கு தண்டனை விதிக்கப்பட்டுள்ளவர்களின் கருணை மனுக்கள் நிராகரிக்கப்பட்டிருப்பது வெந்த புண்ணில் வேலைப் பாய்ச்சுவதாக உள்ளது என்று விடுதலைச் சிறுத்தைகள் கட்சித் தலைவர் தொல்.திருமாவளவன் தெரிவித்துள்ளார்.

இதுகுறித்து புதுச்சேரியில் இன்று செய்தியாளர்களிடம் பேசிய திருமாவளவன், ஈழத்தமிழர்கள் பல லட்சம் பேர் படுகொலை செய்யப்பட்டுள்ள நிலையில், ஈழத் தமிழர்கள் வாழ்க்கை நசுக்கப்பட்டுள்ள நிலையில் பேரறிவாளன், சாந்தன், முருகன் கருணை மனுக்கள் நிராகரிக்கப்பட்டிருப்பது வெந்த புண்ணில் வேலைப் பாய்ச்சுவதாக உள்ளது என்று கூறினார்.

20 ஆண்டுகளுக்கும் மேலாக, ஆயுள் தண்டனையையும் விட அதிகமாக பேரறிவாளன், சாந்தன், முருகன் ஆகியோர் சிறையில் உள்ள நிலையில், அவர்களின் தூக்கு தண்டனை கருணை மனுக்களை குடியரசுத் தலைவர் நிராகரித்திருப்பது கண்டனத்திற்குரியது.

இதற்கு முன்னர் குடியரசுத் தலைவராக இருந்த கே.ஆர்.நாராயணன், அப்துல் கலாம் ஆகியோர் தூக்கு தண்டனை கருணை மனுக்களை தள்ளுபடி செய்யவில்லை என்றும் கூறிய திருமாவளவன், தமிழ் பாதுகாப்பு இயக்கம் சார்ப்பில் நாடு முழுவதும் போராட்டம் நடத்தப்படும் என்றும், நாடாளுமன்றத்தில் குரல் கொடுக்கப்படும் என்றும் தெரிவித்துள்ளார்.