ஈழத்தமிழருக்கு ஏற்பட்ட நிலையால் இளைஞர்கள் கொதித்துப்போய் உள்ளார்கள். இவை அனைத்திற்கும் காரணம் காங்கிரஸ் கட்சியே. மூன்று தமிழர் உயிர் காக்க தமிழக முதலமைச்சர் நடவடிக்கை வேண்டும், மூன்று தமிழர் உயிர் காக்க தாய்தமிழகமக்கள் ஒன்றாக அணிதிரள வேண்டும் என்று மதிமுக பொதுச்செயலாளர் தோழர் வைகோ தனது உரையில் கூறியுள்ளார்.

மூன்று தமிழர் உயிர் காப்பு இயக்கம் சார்பில் மரணதண்டனையை எதிர்த்து சென்னை தியாகராயநகர் முத்துரங்கன் சாலையில் நேற்று மாலை மாபெரும் பொதுக்கூட்டம் நடைபெற்றது. இந்நிகழ்வில் தமிழின கட்சித்தலைவர்களும், இயக்கத்தலைவர்களும் ஒரே மேடையில் ஒன்றிணைந்தனர்.

இந்நிகழ்வுக்கு பழ.நெடுமாறன் அவர்கள் தலைமையேற்க கொளத்தூர் மணி அவர்கள் தொகுத்துவழங்கினார். நிகழ்வில் சிறையில் வாடும் பேரறிவாளனின் தாயார் அற்புதம் அம்மாள், மதிமுக பொதுச்செயலாளர் வைகோ, தமிழர் வாழ்வுரிமைக்கட்சித்தோழர் பண்ருட்டி வேல்முருகன், காந்திய மக்கள் இயக்கத்தோழர் தமிழருவி மணியன், தபெதிக தோழர் கு.இராமகிருட்டிணன், தமிழ்ப்புலிகள் தோழர் நாகை.திருவள்ளுவன, தோழர் தியாகு, மக்கள் நல்வாழ்வு இயக்க தோழர் கண.குறிஞ்சி, இயக்குநர் புகழேந்தி தங்கராசு, வணிகர் சங்கத்தலைவர் த.வெள்ளையன், த.தே.பொ.க தோழர் பெ.மணியரசன், இரா.அதியமான், மே பதினேழு இயக்கப்பொறுப்பாளர் மற்றும் பலர் உரையாற்றினார்கள்.

இந்நிகழ்வுக்கான ஏற்பாட்டினை மதிமுக தென்சென்னை மாவட்டப்பொறுப்பாளர் வேளச்சேரி மணிமாறன் சிறப்புடன் ஏற்பாடு செய்திருந்தார்.