அந்த கால எம்ஜிஆரில் இருந்து, இந்த கால சிம்புவரை அனைத்து நடிகர்களுக்கும் இளமை ததும்பும் பாடல்களை எழுதி, இளமைக் கவிஞர் என்று புகழ் பெற்ற கவிஞர் வாலி மிகவும்  கவலைக்கிடமான நிலையில் மருத்துவமனையில் அனுமதிக்கப் பட்டுள்ளதாக தகவல் தெரிய வருகிறது.

கவிஞர் வாலி மூச்சுத் திணறல் காரணமாக கடந்த மாதம் 8ம் திகதி முதல் அப்பலோ மருத்துவமனையில் அனுமதிக்கப்பட்டு சிகிச்சைப் பெற்று வந்தார். இந்நிலையில் அவரது உடல் நிலையில் எந்த  முன்னேற்றமும்  ஏற்படவில்லை என பிரபல தனியார் மருத்துவமனை ஒன்றிற்கு மாற்றப்பட்டு அங்கு சிகிச்சை அளிக்கப்பட்டு வருகிறது. எனினும் தற்போதும் அவரது உடல்நிலையில் தற்போதும்  எந்தவித முன்னேற்றமும் ஏற்படவில்லை என்றும், மேலும் கவலைக்கிடமாகியுள்ளது எனவும் தகவல்கள் வெளியாகியுள்ளது.

தற்போது அவருக்கு செயற்கை சுவாசம் அளிக்கப்பட்டு வருவதாகவும் வருந்தத்தக்க தகவல்களும் வெளியாகிய வண்ணம் உள்ளது.  நண்பர்கள் உறவினர்கள் மட்டுமே மருத்துவமனையில் அனுமதிக்கப்பட்டு, அவரை பார்த்து வருகின்றனர். நடிகர் கமல்ஹாசன் ஏ. ஆர்.ரஹ்மான் ஆகியோர் நேரில் சென்று நலம் விசாரித்ததாகவும்  கூறப்படுகிறது.

சண்டையிடும் போது எதிரியின் பலத்தில் பாதியை வாங்கிகொண்டு வெற்றி வாகை சூடும் வரம்  பெற்றவன் புராணகாலத்து வாலி என்று கூறப்படுகிறது. எனவேதான், வாலியை மறைந்து இருந்து தாக்கி வெற்றி பெற்றார்கள் என்பார்கள். கவிஞர் வாலி எமனின் சக்தியில் பாதியை பெற்று, போராடி உயிர் பிழைத்துவர அவரது பாடல் ரசிகர்களாக நாம் பிரார்த்திக்கலாமே!