இலங்கையின் வடக்கு பகுதி முன்னேற்றம் குறித்து பிரித்தானியப் பிரதமர் டேவிட் கமரூன் சரியாக மதிப்பீடு செய்யவில்லை.

அவர் தவறாக வழிநடத்தப்பட்டிருக்கிறார் என்று கிரிக்கட்டின் பந்து வீச்சாளரான முத்தையா முரளிதரன் தெரிவித்துள்ளார்.

வடக்கில் மோதல்கள் நிறைவுக்கு வந்த பின்னர் அங்கிருக்கும் நிலைமைகள் முன்னர் இருந்ததைக் காட்டிலும் 1000 மடங்கு முன்னேறியிருக்கின்றன என்று அவர் குறிப்பிட்டுள்ளார்.

பொதுநலவாய மாநாட்டில் கலந்து கொள்வதற்காக இலங்கை வந்திருந்த பிரித்தானியப் பிரதமர் டேவிட் கமரூன் கொழும்பின் கிரிக்கட் மைதானமொன்றில் இளம் வீரர்களுக்கு பயிற்சியளித்துக் கொண்டிருந்த முத்தையா முரளிதரனை நேற்று சனிக்கிழமை காலை சந்தித்து பேசியிருந்தார். அப்போது முரளிதரன் வீசிய பந்துகளை எதிர்கொண்டு கிரிக்கட்டும் ஆடினார்.

அதன் பின்னர் ஊடகங்களிடம் கருத்து வெளியிட்ட முரளிதரன், இலங்கை பற்றி டேவிட் கமரூன் தவறாக வழிநடத்தப்பட்டிருக்கிறார். அடிப்படையில் நான் விளையாட்டு வீரன். அரசியல் பற்றி பேசுவதில்லை. இனங்களுக்கிடையில் நல்லிணக்கத்தைப் பேணுவதே எமது நோக்கம். வடக்கில் வேகமான முன்னேற்றம் காணப்படுகின்றது என்று தெரிவித்துள்ளார்.

இதனிடையே, முரளிதரனின்  இந்தக் கூற்றுக்கு தமிழ் ஊடகங்கள், அமைப்புக்களிடம் கடுமையான அதிர்ப்தி காணப்படுகின்றது. வடக்கின் ஏ9 வீதிகளில் பயணிக்காமல் கொஞ்சமாக உள்நோக்கி பயணித்து நிலைமைகளை அவதானிக்க வேண்டும். அத்தோடு அங்கு வாழும் மக்களுக்கு இருக்கிற பிரச்சினையை சரியாக புரிந்து கொள்ள வேண்டும். எப்போதாவது வடக்கு நோக்கி வந்து நட்சத்திர தங்குமிடங்களில் இருந்துவிட்டு வடக்கு பிரச்சினைகள் பற்றி புரிதல் இல்லாமற் பேச வேண்டாம் என்று முரளியை நோக்கி எதிர்வினைகள் முன்வைக்கட்டுள்ளன.