பொது எதிரணியின் ஜனாதிபதி வேட்பாளர் மைத்திரிபால சிறிசேனவின் தேர்தல் பிரச்சாரக் கூட்டங்கள் வடக்கு மாகாணத்தில் இன்று செவ்வாய்க்கிழமை இடம்பெறுகின்றது.

இதில், மைத்திரிபால சிறிசேனவோடு, முன்னாள் ஜனாதிபதி சந்திரிக்கா குமாரதுங்க, எதிர்க்கட்சித் தலைவர் ரணில் விக்ரமசிங்க, முன்னாள் இராணுவத்தளபதி சரத் பொன்சேகா, ஜனநாயக மக்கள் முன்னணியின் தலைவர் மனோ கணேசன், சிறீலங்கா முஸ்லிம் காங்கிரஸின் தலைவர் ரவூப் ஹக்கீம் உள்ளிட்ட முக்கியஸ்தர்களும் கலந்து கொள்கின்றனர்.

ஆனாலும், மைத்திரிபால சிறிசேனவுக்கான ஆதரவினை இன்று காலை வெளியிடும் என்று எதிர்பார்க்கப்படும் தமிழ்த் தேசியக் கூட்டமைப்பின் முக்கியஸ்தர்கள் எவரும் பிரச்சாரக் கூட்டங்களில் பங்கெடுக்க மாட்டார்கள் என்று தெரிகிறது.

மன்னார் நகரசபை விளையாட்டு மைதானத்தில் இன்று காலை 09.00 மணிக்கு இடம்பெறும் பிரச்சாரக் கூட்டத்தில் பங்கெடுக்கும் பொது எதிரணியினர், அதனைத் தொடர்ந்து காலை 10.00 மணிக்கு வவுனியா கலைமகள் விளையாட்டுக்கழக மைதானத்தில் இடம்பெறும் பிரச்சாரக் கூட்டத்தில் கலந்து கொள்கின்றனர்.

அதன் பின்னர், பிற்பகல் 02.00 மணிக்கு முல்லைத்தீவில் நடைபெறவுள்ள பிரசாரக் கூட்டத்தில் பங்கேற்கவுள்ள பொது எதிரணியினர், 03.00 மணிக்கு கிளிநொச்சி சென்று அங்கு நடைபெறும் கூட்டத்திலும் கலந்துகொள்வர்.

பின்னர், யாழ்ப்பாணம் முத்திரைச் சந்தியில் அமைந்துள்ள பூங்காவில் நடைபெறும் பிரமாண்டமான பிரசாரக் கூட்டத்தில் மாலை 04.00 மணிக்கு பங்கேற்பர். அதனைத் தொடர்ந்து இரவு 07.30 மணிக்கு யாழ் மாவட்ட வர்த்தக சங்கப் பிரதிநிதிகளுடன் பொது எதிரணியினர் கலந்துரையாடலொன்றை நடத்தவுள்ளனர்.