பாஜகவின் ஓராண்டு கால ஆட்சி சாதனை பட்டித் தொட்டிகளைச் சென்றடைய வேண்டும் என்று பாஜகவின் தேசியத் தலைவர் அமித் ஷாவிடம் பிரதமர் நரேந்திர மோடி கூறியதாகத் தெரிய வருகிறது.

பாஜகவின் ஓராண்டு ஆட்சி காலம் நிறைவடைந்ததை முன்னிட்டு, அமித் ஷா டெல்லியில் இன்று செய்தியாளர்களை சந்தித்தார். அப்போது பாஜக ஆட்சியில் ஊழல் ஒழிந்துள்ளதை சுட்டிக்காண்பித்துப் பேசினார். மேலும், இந்தியர்கள் வெளிநாடுகளில் பதுக்கி வைத்திருக்கும் கறுப்புப் பணத்தை மீட்டு இந்தியாவுக்கு கொண்டு வருவதை லட்சியமாகக் கொண்டு செயல்பட்டு வருகிறது பாஜக அரசு என்றும் கூறியுள்ளார்.

சுதந்திரம் அடைந்து 60 ஆண்டு கால ஆட்சியில் இப்போதுதான் முறையான ஆட்சி மத்தியில் நடைப்பெற்று வருகிறது என்று கூறினார். கடந்த ஓராண்டு கால பாஜக ஆட்சியில் விவசாயிகள் தற்கொலை என்பது மிகவும் குறைந்துள்ளது என்றும் அமித் ஷா கூறியுள்ளார். பாஜகவின் ஓராண்டு கால ஆட்சியின் சாதனை பட்டித் தொட்டி மக்களையும் சென்றடையும் வகையில் நாடு முழுவதும் 700 பேரணிகள், 5 ஆயிரம் பொதுக்கூட்டங்கள் நடத்த வேண்டும் என்று மோடி தம்மிடம் ஆலோசித்ததாகவும் அமித் ஷா கூறியுள்ளார்.

நாடு முழுவதும் உள்ள பாஜகவினர் இந்த மாதம் முழுவதும் பேரணிகள், பொதுக்கூட்டங்கள் நடத்துவார்கள் என்றும், இதன் மூலம் அனைத்துத் தரப்பு மக்களிடமும் பாஜகவின் ஆட்சி சாதனையை எடுத்து வைப்பார்கள் என்று அமித் ஷா கூறியுள்ளார். பிரதமரின் மேக் இன் இந்தியா திட்டம் சர்வதேச அளவில் மிகவும் புகழ்ப் பெற்றுள்ளது என்றும் அமித் ஷா பிரதமரின் திட்டத்துக்குப் புகழாரம் சூட்டியுள்ளார்.