மஹிந்த ராஜபக்ஷவின் பாதுகாப்பிற்காக நியமிக்கப்பட்டிருந்த பொலிஸ் உத்தியோகத்தர்களில் 42 பேர் மீள அழைக்கப்பட்டுள்ளனர். உடன் அமுலுக்கு வரும் வகையில் நேற்று புதன்கிழமை இவர்கள் அமைச்சர்களுக்கான பாதுகாப்பு பிரிவிற்கு மீள அழைக்கப்பட்டுள்ளதாக மஹிந்தவின் பிரத்தியேக செயலாளர் உதித் லொக்குபண்டார தெரிவித்துள்ளார்.

அத்தோடு, பதிலீட்டு நடவடிக்கைகள் எவையும் இன்னமும் மேற்கொள்ளப்படவில்லையென்றும் அவர் குறிப்பிட்டுள்ளார்.

எவ்வாறாயினும் பொலிஸ் தலைமையகத்திலிருந்து அவ்வாறான உத்தரவு எதுவும் பிறப்பிக்கப்படவில்லையென தெரிவித்துள்ள பொலிஸ் ஊடகப் பேச்சாளர் பிரியந்த ஜயக்கொடி, அமைச்சர்களுக்கான பாதுகாப்பு பிரிவினால் உள்ளக ரீதியான உத்தரவு பிறப்பிக்கப்பட்டிருக்கலாம் என்று கூறியுள்ளார்.