திமுக தலைவர் கருணாநிதி, காங்கிரஸ் தலைவர் சோனியா காந்தி, திமுக பொருளாளர் மு.க.ஸ்டாலின், காங்கிரஸ் துணைத் தலைவர் ராகுல் காந்தி அனைவரும் ஒரே மேடையில் தேர்தல் பிரச்சாரம் மேற்கொள்ள உள்ளனர் என்று தமிழக காங்கிரஸ் கமிட்டித் தலைவர் இவிகேஎஸ்.இளங்கோவன் கூறியுள்ளார்.

தமிழக சட்டப்பேரவைக்கு வருகிற மே 16ம் திகதி தேர்தல் நடக்க உள்ள நிலையில் திமுக-காங்கிரஸ் கூட்டணி அமைத்துள்ளது. நேற்று திமுக தேர்தல் அறிக்கையை வெளியிட்ட நிலையில், தேர்தல் அறிக்கை மிகவும் நன்றாக உள்ளது என்றும், அறிக்கைகள் அனைத்தும் மிகவும் பயனுள்ளவை என்றும் தெரிவித்து, கருணாநிதியைப் பாராட்ட அவரை அவரது இல்லத்தில் இவிகேஎஸ்.இளங்கோவன் சந்தித்தார்.

பின்னர் சத்ய மூர்த்தி பவனில் தமிழ் மாநில காங்கிரஸ் கட்சியின் அதிருப்தியாளர்கள்; காங்கிரஸில் மீண்டும் இவிகேஎஸ்.இளங்கோவன் தலைமையில் இணைந்தனர். அப்போது பேசிய அவர், தமிழ் மாநில காங்கிரஸில் இருந்து யார் வேண்டுமானாலும் காங்கிரஸில் இணையலாம் என்றும், தேசத் துரோக கட்சியான பாஜகவுடன் கூட்டணிக் குறித்துப் பேசிய ஜி.கே.வாசனுக்கு மட்டும் காங்கிரஸில் இடமில்லை என்று கூறினார்.அப்போது ஒரே மேடையில் அன்னை சோனியா காந்தி, ராகுல் காந்தி, கலைஞர் கருணாநிதி, மு.க.ஸ்டாலின் இணைந்து தேர்தல் பிரச்சாரம் மேற்கொள்வார்கள் என்றும், விரைவில் அதுக் குறித்த அறிக்கை வெளியாகும் என்றும் இவிகேஎஸ்.இளங்கோவன் கூறியுள்ளார்.